Auzoko

Euskara, aniztasuna eta herritarrak, hiru gako horiek barne biltzen ditu Auzoko egitasmoak.

Elkarrena ezagutu eta aitortuz, jatorri ezberdinetako herritarren artean, guztion arteko kohesio eta komunikazio hizkuntza euskara izatea da gure erronka.

Gure herrietako errealitatea kulturanitza eta eleanitza da. Aberastasun hori ezagutu eta berdintasunean oinarritutako elkarbizitza eraikitzea da Auzoko hizkuntza harrera egitasmoaren helburua, beti ere euskara komunikazio eta kohesiorako tresna izanik.

HELBURUAK

Auzoko lankidetzarako, elkartrukerako eta borondatezko parte-hartzea bideratzeko hizkuntza egitasmoa bat da.

Herritarrak daude oinarrian eta euskara erdian. Auzoko herritar guztiei irekita dagoen egitasmoa da, euskara gero eta guztionagoa egiteko bokazioa duena, jorra dezagun eskuz esku, ahoz aho!

Hiru helburu nagusi ditu egitasmoak:

Hurbilketa

Euskaratik urrun bizi diren herritarrak euskarara hurbiltzea

Aniztasuna

Herritarrak gure herrietako hizkuntza aniztasunaz jabetzea

Harremana

Hizkuntza desberdinetako herritarrak harremanetan jartzea, norberarena eta besteena aintzat hartuta

Herri euskaldunetan euskara da kohesio eta komunikazio hizkuntza, eta badira euskaraz gain hitz egiten diren beste hizkuntzak ere.

Auzoko egitasmoan hizkuntzak pertsona baten gizarteratzean duen garrantzia kontuan hartzen dugu eta euskaratik urrun dauden herritarrei (auzokideak), euskarara lehen urratsak eman ahal izateko ibilbidea eskaintzen zaie herritar euskaldunen (auzotarren) eskutik, horretarako sortutako lagun taldeen bidez.

Talde hauen funtzionamendua ludikotasunean, horizontaltasunean, elkar ezagutzan eta elkar aitortzan oinarritzen da.

Auzokoren bidez, euskaraz ez dakiena euskarara hurbildu nahi da eta hizkuntza desberdinetako herritarrak harremanetan jarri. Harreman zuzenaren eta hurbiltasunaren bidea dira beste hizkuntzetako hiztun helduak euskarara hurbiltzeko erarik onenak.

Egitasmoaren azken helburua ez da inor euskalduntzea, baina bai horretarako atea irekitzea, ikasi nahi izateko hizkuntza ezagutzea baita lehen pausua.

Gainera, hizkuntza harrera egitasmo honek, elkarbizitzako helburu garrantzitsuak jorratzen ditu, hala nola, elkar ezagutza, hurbilketa, aurreiritziak gainditzea eta elkarren aitortza.

Bide horretan, norberaren hizkuntza ohituren gaineko hausnarketa bideratzen du egitasmoak, bai euskaldunengan eta baita euskaratik urrun bizi diren herritarrengan ere. Hizkuntzaren normalizaziorako ezinbestekoa da egungo gure herrietako kultur eta hizkuntza aniztasunaz ohartzea eta bide horretan lan egitea.

Auzokoak, euskara eta aniztasunaren inguruko dokumental hunkigarria ikustera gonbidatzen zaitugu.

Elkarrekin eta euskaraz bizitzea posible da. Horixe da Auzokoak dokumentaleko protagonistek kontatzen dizkiguten bizipenetatik ondorioztatzen dena.

Auzoko komunitatearen esperientziak ezagutzeko aukera paregabea!

· HARREMANATUTAKO EGITASMOAK ·

· HARREMANA ·

1. Datuen arduraduna: Euskaltzaleen Topagunea
2. Datuen helburua: Topagunearen egitasmo eta ekimenen berri bidaltzea.
3. Datuen biltegia: Profesional Hosting-n ostatutako datu-basea
4. Eskubideak: Zure informazioa mugatu, berreskuratu edota ezabatu dezakezu edozein unetan.

+ 46 = 56